Пелистер волеј го намачи шампионот, но сепак загуби на стартот од сезоната

Одбојкарките на Пелистер волеј од Битола вечерва со натпреварот против екипата на Јанта од Скопје ја отворија новата одбојкарска сезона, а ова беше нивни прв натпревар после враќањето во Првата лига – 1-3 (25-21. 19-25. 22-25, 20-25).

Битолскиот прволигаш влезе амбициозно во дуелот со шампионот и имаше одлична премиера во прволигашкото друштво потврдувајќи, уште на стартот дека ќе биде силен прптивник за сите екипи. Пелистер волеј го освои првиот сет, а потоа целиот натпревар беше возбудлив, динамичен, содржаен со многу пресврти и борбена игра.

Јанта Волеј КВ, одигра мирно и мудро, ги намали грешките и ја корегираше играта во поле, а тоа му донесе комплетен пресврт на мечот и стартна победа во новата сезона. Пелистер волеј имаше 22-19 во третиот сет, но со серија 7-1 шампионот го доби овој дел од мечот и со тоа си го трасираше патот кон победата.